སྙན་ངག་སྐོར་གྱི་ཇ་ཞོར་ཁ་བརྡ།__སེང་རྡོར།

ཀ སྐུ་ཁམས་བཟང་། ཉིན་འགའི་སྔོན་ལ་ཁྱེད་ཀྱི་སྙན་དེབ་གསུམ་པ<<ཉག་གའི་ལྗང་སེར་གློ་དམར>>ཞེས་ པ་ལག་སོན་བྱུང་། གཞུང་གི་ཡིག་གཟུགས་ཅུང་ཆུང་བ་དང་དཔར་ཁང་གི་ལག་རྩལ་གྱིས་མ་ལྡེང་བའི་སྐྱོན་ ཏོག་ཙམ་མཆིས་པ་མ་གཏོགས། དངོས་གནས་ཆ་ཚང་ཞིང་གསར་ཐག་ཆོད་པ་ཞིག་རེད། ཁོ་བོ་ཁྱེད་ཀྱི་སྙན་ངག་ལ་རབ་ཏུ་སྤྲོ་མཁན་ཞིག་ཡིན་ཆ་ནས་ད་ལན་དྲི་བ་འགའ་འདོན་ རྒྱུ་ཡོད། རྗེས་སོར་དབྱིན་བསྒྱུར་བྱེད་པའི་གོ་རིམ་ཁྲོད་ཉིད་ལ་སྙན་སེང་ཞུ་དགོས་པ་མང་ པོ་འབྱུང་ངེས་པས་དྲན་ཚུལ་ལྷུག་པོར་བརྗོད་རྒྱུ་གལ་ཆེ།

ཁ དེ་ག་རང་ རེད། དེབ་འདིའི་གློག་པར་བཟོ་སྟངས་དང་དཔར་ཁང་གིས་གཏུབ་གཅོད་བྱས་པ་སོགས་ལ་སྣང་བར་ མི་འགྲོ་བའི་ཆ་འགའ་ཞིག་ཐོན་འདུག དེ་མིན། ཡིག་གཟུགས་ཅུང་ཆུང་བ་དང་ཚེག་བར་ཅུང་དམ་པ་སོགས་ནི་བསམ་གཟས་ཀྱིས་ཡིན། ཉུང་ངུ་མང་པོར་བསྐྱེད་ཅིང་སྲབ་བུ་རྒྱགས་པར་སྤྲུལ་པའི་རྣམ་པ་རྫིག་པོ་ཞིག་བཟོས་པས་མི་ཕན་སྙམ་སྟེ་བསྐྱུར་བཞག ལག་ནང་འཁྱེར་བདེ་ཞིང་གློ་ཁུག་ལ་ལྟེབ་གོར་བྱས་ཏེ་བཅུག་ཀྱང་ཡོང་བའི་བོངས་ཚད་ཤ་ཚ་ལེ་འདི་འདྲ་ཁོ་བོས་ཆེད་མངགས་ཀྱིས་བཟོས་པ་ལགས།  

ཁྱེད་ སོགས་ཀྱིས་ཁོ་བོའི་སྙན་ངག་དག་ཕར་དབྱིན་ཡིག་སོགས་སུ་བསྒྱུར་པར་བཀའ་དྲིན་ཞུ་ ཟེར་དགོས་ལས་ཆེ་མོད། མ་ཡིག་གི་དོན་ཇི་བཞིན་པ་ཞིག་ཡོང་ཐབས་བྱེད་རྒྱུ་ཅིས་ཀྱང་ཐུགས་ལ་འཛིན་དགོས་སོ།

ཀ མི་ལ་ལས་སྙན་ངག་ཅེས་པ་ཡོང་དཀའ་ཞིང་རྩོམ་མི་ཐུབ་པ་ཞིག་ཡིན་པར་བཤད། ཡང་ལ་ལས་སྙན་ངག་ནི་སུས་ཀྱང་བྲི་ཆོག་ལ་གང་གིས་ཀྱང་བྱེད་ནུས་པ་ཞིག་ཡིན་པར་བརྗོད། ཁྱེད་ནི་དེ་གཉིས་ཀྱི་གང་ལ་གཏོགས།
     ཁ ཁོ་བོས་ནི། སྙན་ངག་པ་མི་ཡིན་པ་དང་སྙན་ངག་ནི་མིས་བྲིས་ཏེ་ཡོང་བ་དང་ ང་ཚོ་ཡང་མི་ཡིན་པ་བཅས་ཀྱིས། དེ་འདྲའི་ཐུབ་དཀའ་ཤིན་ལྐོག་ཅིག་ཨེ་རེད་དམ་སྙམ། ཡིན་ཡང་། སྙན་ངག་ནི་དཀྱུས་མའི་སྐད་ཆ་ཙམ་མིན(སྐད་ཆ་ཙམ་ཡིན་ན་སྙན་ངག་ཅེས་པའི་མིང་ཟུར་ བ་ཞིག་དགོས་དོན་མེད)པར་མཚོན་སྟོབས་དང་འདྲེན་ཤུགས(མཚོན་སྟོབས་ཆེ་བའི་དབང་ གིས་སྙན་ངག་ཏུ་གནམ་ས་ཤོངས་ཐུབ་ཅེས་པའི་གྲགས་ཚིག་བྱུང་བ་ཡིན་ལ་འདྲེན་ཤུགས་ ཆེ་བའི་རྐྱེན་གྱིས་ད་ལྟའི་བར་སྙན་ངག་ལྟ་ཀློག་པ་དང་འབྲི་རྩོམ་པ་འཁྲུག་པོར་ ཡོད་པ་འདིའོ)ཀྱི་བདག་ཉིད་ཅིག་ཡིན་པ་རང་རེ་ཀུན་ལ་མྱོང་བས་གྲུབ་ཕྱིར། སྟབས་སླ་པོས་བྲི་མི་ནུས་པ་རང་བདེན་ནོ་སྙམ།
      ཀ སྙན་ངག་ནི་ཚིག་མིན་ཞེས་ཟེར་མཁན་ཡོད་པས་དེ་ཅི་ལྟར་འགྲེལ་ལམ།
      ཁ སྙན་ངག་གི་དགོས་པ་དང་ཉིང་དགོས་གཉིས་ཚིག་ མིན་ཞེས་བརྗོད་མཁན་ཡོད་ན་མ་གཏོགས། སྤྱིར་སྙན་ངག་ལ་ཚིག་མི་དགོས་ཞེས་སུས་ཀྱང་ལབ་མྱོང་མེད་ཚོད་རེད། ངོས་གཅིག་ནས་ནི། སྙན་ངག་ནི་ཐ་སྙད་ཡོད་ཚད་བཙོ་སྦྱང་བྱས་པའི་ཉིང་བཅུད་ཡིན་ཞེས་སྐུ་ཞབས་འབྲོང་ ལགས་ཀྱིས་བཤད་པ་ལྟར་རོ། ཆེས་མ་མཐའི་ཚིག་སྦྱོར་ཙམ་ཡང་དཀའ་ན་དེ་ལ་བརྟེན་པའི་སྙན་ངག་ཅེས་པ་གང་ནས་ཡོང་ དགོས།
       ཀ དུས་རབས་སྔ་མ་སྔ་མའི་སྙན་ངག་ལས་ཕྱི་མ་ཕྱི་མའི་སྙན་ངག་བཟང་བ་ཞིག་ཡིན་ནམ།

 ཁ སྙན་ངག་ནི་ཀུང་སི་ཆེ་གེ་མོས་བཟོས་པའི་ཐོན་རྫས་དང་འདྲ་ས་མ་རེད། དེ་བས་ཐོན་རིམ་དང་པོ་ལས་གསུམ་པ་བཞི་པ་སོགས་རིམ་པས་ཇེ་བཟང་འགྲོ་བ་ཞིག་ཡིན་ མི་སྙམ། ངས་བལྟས་ན། མི་ཡོད་པ་ནས་སྙན་ངག་ཡོད་ཟིན་ནོ། ཡི་གེར་བྲི་མི་བྲི་དང་དེབ་ཏུ་བཟོ་མི་བཟོ་དང་བོད་སྐད་དང་དབྱིན་སྐད་གང་གིས་ རྩོམ་མི་རྩོམ་སོགས་ནི་སྙན་ངག་བྱེ་བྲག་པ་དང་འབྲེལ་བ་སྤུ་ཙམ་ཡང་མེད། སྙན་ངག་ཅིག་གི་དགེ་བ་དེ་འོད་གསལ་དུམ་བུ་ཞིག་དང་སྤྲིན་དཀར་ཕོན་པོ་ཞིག་དང་ འདྲ་བས། དེ་ལ་ཚབ་བྱེད་ཀྱི་དངོས་པོ་གཞན་མེད་ལ་མཐོ་དམན་གྱི་ཨང་རིམ(དཔྱད་བརྗོད་པ་ཚོ་ འདུས་པའི་སྡེ་ཚན་འགའ་རེས་བྱ་དགའ་སོགས་སྤྲོད་བཞིན་མཆིས་མོད། མི་རིགས་ཆེ་གེ་མོའི་རྩོམ་རིག་དར་འཕེལ་སོགས་ཀྱི་ཕྱིར་ཡིན་ཞེ་ན་འདྲ་ཆགས་ཙམ་ ཡོད་ཀྱང་། ལར་སྙན་ངག་གི་མཛེས་པ་དང་ཉམས་ཁྱད་དེ་མི་རེ་ཟུང་གི་དགའ་ཁ་འཁྱེར་ཕྱོགས་ཀྱིས་ སྦྲད་པའི་བྱ་དགའ་ཨམ་དེས་གཞར་ཡང་མཚོན་ཐབས་བྲལ)ཡང་སྤྱིར་བཏང་དབྱེ་རྒྱུ་མེད་པ་ ཡིན།
      ཀ ཁྱེད་ཀྱིས་བལྟས་ན། རང་གི་སྙན་ངག་ལ་འབྱུང་འགྱུར་བོད་ཀྱི་རྩོམ་རིག་ལོ་རྒྱུས་ཁྲོད་དུ་གདན་ཐོབ་ག་འདྲ་ཞིག་འཐོབ་སྲིད།
     ཁ ཁོ་བོས་སོ་སོའི་སྙན་ངག་གིས་རྩོམ་རིག་ལོ་རྒྱུས་ཁྲོད་དུ་འདི་འདྲ་ག་འདྲ་བྱ་ དགོས་ ཟེར་གྱིན་མེད། ངའི་སྔོན་ལ་འཁྲུངས་ཟིན་པ་དང་ང་དང་མཉམ་དུ་མགོ་ཚོས་ཀྱིན་པའི་མི་འདི་ཚོས་རང་ གི་སྙན་ངག་ལ་གཏམ་ག་རེ་ཤོད་པར་ཡང་མི་བལྟ། བྱ་དགའ་འབའ་ཞིག་སྙན་ངག་གི་ཚད་ཤིང་བྱེད་པ་ དེ་ཚོའི་བློར་ཨེ་དབབ་ཡང་རེམ་རྩིས་མེད། ཚོགས་འདུ་བསྡུས་ཏེ་ལག་པ་བསླངས་མཁན་གྱི་མང་ཉུང་ལ་དཔགས་ཏེ་སྙན་ངག་གི་རྒྱལ་ཕམ་ རྩོད་པ་དེ་འདྲ་ཡང་ཚེགས་ཀྱིས་མི་ལྕོགས་སོ། དྲ་ཐོག་སོགས་སུ་མི་མགོ་སྐོར་རེའི་ཁ་ཚོགས་ཀྱི་རླངས་པ་ལ་བརྟེན་ནས་སྙན་ངག་ཡིན་ མིན་ཞིག་འཇོག་པ་བཞིན་དེར་ཡང་འཚང་འདོད་མི་འདུག
     ངས་ སྙན་ངག་འབྲི་དོན་ནི། སུ་ལ་ལབ་ཀྱང་ཡ་མི་བྱེད་པའི་དྲན་ཚུལ་ཕར་འཛིང་ཚུར་འཛིང་དེ་ཚོ་ཡི་གེར་བྲིས་ཏེ་ ཤར་མར་བཏོན་ན་སེམས་ནང་དགེ་བ་འཕེལ་ཐུབ་པ་དང་། དོན་མེད་དུ་ཕམ་ཞིང་རྐྱེན་མེད་དུ་ངུ་སྙིང་འདོད་ དུས་སྙན་ངག་ཡིན་ཞེས་གཅིག་བྲིས་ན་སྙིང་གི་ལྡང་ཚད་ཇེ་དམར་ཕྱིན་རྒྱུར་ཕན་ཐོགས་ འབྱུང་བ་དང་། གློ་བུར་དུ་འཇིག་རྟེན་དང་མི་ཚེ་ལས་འཕྲོས་པའི་དྲན་ཚུལ་སྣ་རེ་བྱུང་སྐབས་ཚིག་ ཐུང་རེ་འགས་མཚོན་པར་བྱས་ན་རྒྱབ་ཀྱི་ཁལ་ཕོག་པ་ལྟ་བའི་བདེ་སྣང་རྙེད་པ་བཅས་ ཀྱིས་ཡིན།
     ང་ཡིས་གཞན་དག་ལྟར་སྐྱབས་ དང་སྐྱོབ་པའི་ཕྱོགས་གསོལ་བ་བཏབ་སྟེ་ཚིམས་པ་རྙེད་ རྒྱུ་དཀའ་ཙམ་རེད། མི་རྒན་དག་གིས་བསླབ་བྱ་འདྲ་བཏང་ནའང་རྣ་ནང་ཡེ་མི་འགྲོ ། སྨྱོ་གྲབས་དང་བརྒྱལ་གྲབས་གང་གི་སྐབས་ཀྱང་རེ་ས་ཉག་གཅིག་ཡོད་པ་ནི་སོ་སོས་ འབྲི་ཁུལ་བྱས་པའི་སྙན་ངག་གམ་ཚིགས་ བཅད་འདི་དག་རེད། འདི་དག་གིས་ཁོ་བོ་རང་གི་མི་ཚེའི་ནང་དངོས་པོ་གཞན་གྱིས་ཚབ་བྱེད་མི་ཐུབ་པའི་ ཕན་པ་ངོ་ཐོག་འབྱུང་བཞིན་པས་ཡིད་ཚིམས་ལ་སེམས་དགའ། ང་ལ་མཚོན་ན་འདི་ཙམ་གྱིས་འགྲིག་བསྡད་ཡོད། སྤྱང་པོ་ཆེ་གཞན་དག་ལྟར་དང་པོ་རང་གིས་བྲིས་པ་དེ་དག་སྙན་ངག་ཏུ་འགྲོ་རྒྱུར་ཁ་ མང་པོའི་དཔུང་རོགས་བཙལ། དེ་ནས་བློ་དང་བཀོད་པ་སྣ་ཚོགས་བྱས་ཏེ་ཕྲན་དཔྱད་དང་བྱ་དགའ་ཟེར་ཡས་དེ་ཚོ་ལོན་ ཐབས་སུ་འབད། མཐར་རང་དང་བློ་ཁ་མཉམ་པ་འགའ་ཞིག་གིས་ཁས་འཆེས་པའི་སྡོམ་ཆུང་ངུ་ཙམ་ལ་བརྟེན་ནས་ སྙན་ངག་ཡིན་མིན་གྱི་རང་ལྟ་ཉི་ཚེ་བ་རེ་བཞག དེ་ནས་ཡང་སོ་སོའི་རྣམ་གཞག་ཉག་ཕྲ་བ་དེ་དག་ལ་གཞན་གྱིས་གནོད་བྱེད་འདྲ་བསྟན་པ་ ཚོར་དུས་འཛུལ་སའི་ཁུང་དང་འདུག་སའི་སྟེགས་མི་རྙེད་པ་ཙམ་དུ་འཚབ་པ་སོགས། ཉིན་མཚན་དུས་དྲུག་པོར་སོ་སོའི་ལུགས་ཀྱི་སྙན་ངག་ཅེས་པ་དང་མཉམ་དུ་དམྱལ་བ་མནར་ མེད་མྱངས་མཁན་དེ་འདྲ་རེ་ལ་མ་གྱུར་པ་ཅི་འདྲའི་སྐལ་བ་བཟང་ཨང་སྙམ། མཐར་གཏུགས་ན། ངས་སྙན་ངག་འབྲི་བ་ནི་སོ་སོ་རང་གི་དབང་པོའི་ལྷན་སྐྱེས་ཀྱི་དགོས་མཁོ་ཞིག་ སྐོང་བ་དང་ཆ་འདྲ་བས་སྐྱེས་བུ་གཉིས་པ་ཚུན་ཆད་ལ་དེ་ཙམ་ལྟོས་པ་མེད་ཅེས་བཤད་ཆོག ལྟོས་དགོས་པ་བག་ཙམ་ཡོད་ཟེར་ན། བོད་ལ་ཡི་གེ་ཕྲད་སོགས་ཀྱི་སྤྱི་འགྲོས་རགས་པ་ཞིག་ཡོད་ཟིན་པས་དེ་དང་འགལ་མི་ དགོས་པའི་སྐབས་སུ་མི་འགལ་བ་བྱེད་རྒྱུ་དེའོ།
      ཀ གྲོགས་པོ་ཞིག་ན་རེ། ལོ་རབས་བརྒྱད་ཅུ་པའི་སྐབས་སུ་ང་ཚོས་བུད་མེད་བརྗོད་བྱ་བྱས་ཏེ་སྙན་ངག་བྲིས་པ་རེད། ད་དུང་ཡང་བུད་མེད་སོགས་བྲིས་ན་བསྐྱར་ཟློས་ཡིན་པས་སྙིང་པོ་མི་འདུག་ཟེར། ཁྱེད་ཀྱིས་བལྟས་ན་དེ་འདྲ་རེད་དམ།
     ཁ སྤྱིར་བཏང་ཕོ་མོ་གཉིས་ལ་འགྲོ་འཆག་ཉལ་འདུག་བཞི་དང་དགའ་སྐྱོ་ཆགས་སྡང་བཞི་ བསྣན་པའི་བཅུ་ཙམ་ནི་སྙན་ངག་སོགས་ཀྱི་དུས་གཏན་གྱི་བརྗོད་བྱ་རེད། འདི་ལ་བསྐྱར་ཟློས་སོགས་གླེང་ས་མེད། མི་རྣམས་ཀྱིས་འདི་བཅུ་ཙམ་པོ་ཟུར་མི་འདྲ་བ་ལ་བཞག་སྟེའམ། མིང་མི་འདྲ་བ་རེ་བཏགས་ཏེའམ། ཡུལ་མི་འདྲ་བ་རུ་བསྐྱལ་ཏེའམ། གང་ལྟར་འདི་བཅུ་ཙམ་པོ་ཕར་བསྐོར་ཚུར་བསྟར་བྱ་རྒྱུ་མ་གཏོགས་ལྷག་པ་ཞིག་བྲི་རུ་ མེད་སྙམ། ཆོས་ལུགས་དང་སློབ་གསོ་ཟེར་ཡས་ཚང་མ་མིའམ་ཕོ་གཉིས་མ་གླེང་བར་ཡོང་ཐབས་ཅི་ཡོད། ངས་བལྟས་ན། འཛམ་གླིང་གི་བརྩམས་སྒྲུང་རིང་པོ་དང་སྙན་ངག་ཡ་མཚན་ཟེར་ཡས་དེ་ཚོ་གང་ཡང་འདི་ བཅུ་ཙམ་གྱི་དྲང་ལྡོག་གི་འབྲེལ་བ་དང་ནང་གནས་ཀྱི་རྒྱབ་མདུན་འབའ་ཞིག་ལས་འདའ་ མེད་སྙམ། ཡང་གཅིག་བཤད་ན་ལས་དབང་ངམ་བྱེད་པོས་མི་རྣམས་ལ་ཚད་མེད་པའི་བུད་མེད་སོགས་ཀྱི་ རང་བཞིན་མཚོན་པར་ཚད་ཡོད་པའི་རི་མོ་དང་རོལ་མོ་ཡི་གེ་སོགས་ཀྱི་བརྡ་བྱེད་ཉུང་ ངུ་འདི་ཙམ་ལས་བསྩལ་མེད་པས། དེ་དག་ཡོངས་སུ་མཚོན་ཚར་བའི་ཉིན་མོ་ཞིག་ཧ་ལམ་བསླེབ་རྒྱུ་མེད(བརྒྱ་ལ་ཉིན་མོ་ དེ་འདྲ་ཞིག་བསླེབ་ཚེ་ང་ཚོར་ཡང་སྙིང་པོ་ཅི)པ་འདྲ།

ཀ ཁྱེད་རང་སྙན་ངག་ལ་ཧ་ཅང་དགའ་བ་ཨེ་རེད།

ཁ སྐོར་ཞིག་ལ་ཁྱོད་ཀྱི་དེ་སྙན་ངག་རེད་ལབ་ན་དགའ་བ་དང་མ་རེད་ལབ་ན་ཁྲོ་བར་འགྱུར་ ཁར། སྙན་ངག་པ་ཆེ་གེ་མོའི་ཚིག་དྲངས་ཏེ་རང་གི་དེ་སྙན་ངག་ཅེས་པ་ཡིན་ལུགས་ཀྱི་རྟགས་ དངོས་སུ་སྟོན་རྒྱུའང་ཟེར། ཁོ་བོར་མཚོན་ན་རང་གི་འདི་དག་སྙན་ངག་ཅེས་པའི་དཔར་གཞོང(ལར་སྙན་ངག་ལ་ངེས་གཏན་ གྱི་དཔར་གཞོང་ཞིག་ཡོད་པ་མིན་ཏེ། མིའི་རྣམ་རྟོག་གི་སྒོ་མོ་བརྒྱད་ཁྲི་བཞི་སྟོང་དེ་དོན་རྒྱན་སོ་ལྔ་ལྟ་བུའི་ གྲངས་ཀ་ཞིག་གིས་གཅུན་མི་ནུས་ལ། ཡིད་བརྙན་དང་རྟོགས་པའི་ཁམས་ཞེས་པའི་བརྡ་ཆད་གུ་ཐུག་རེ་གཉིས་ཀྱིས་དམ་ལ་ཐོགས་ པ་ཞིག་ཀྱང་ག་ལ་ཡིན)ཞིག་ལ་འཕྲོད་དགོས་དོན་ཅི་ཡང་མེད། མི་རང་བདག་ལ་དབུགས་འབྱིན་རྔུབ་བཞིན་གལ་ཆེ་ཞིང་གཞན་སྐོར་ཞིག་ལའང་ཀློག་སྤྲོ་ འདོན་བདེ་ཞིག་ཡོད་པའི་ཚིགས་བཅད་འདི་དག་ནི། ཡོངས་གྲགས་ཀྱི་དོན་བརྗོད་སྙན་ངག་དང་དུངས་བརྗོད་སྙན་ངག་གཉིས་ཀྱི་གཅིག་ཡིན་ན་ ཆོག་ལ། དེ་གཉིས་ཀ་མིན་ནའང་ཆོག སྤྱིར་སྙན་ངག་གི་རིགས་དབྱེ་གཞན་ཞིག་ལ། ལོ་རྒྱུས་སྙན་ངག་དང་སྒྲུང་རབས་སྙན་ངག ཟློས་གར་སྙན་ངག་དང་གཏམ་བརྗོད་སྙན་ངག གླུ་གཞས་སྙན་ངག་དང་ཁ་བརྡའི་སྙན་ངག་སོགས་གྲངས་ཀྱི་མཚམས་མེད་ཅིང་། མིང་གིས་མ་བཏགས་པའི་སྙན་ངག་རྩོམ་ལུས་དང་འབྱུང་འགྱུར་ད་གཟོད་གཞི་གྲུབ་སྲིད་ པའི་སྙན་ངག་གི་རྣམ་པ་གཞན་ཡང་འཐོན་ཆོག་ཆོག་ཏུ་འདུག་པས། ངེས་པར་དུ་ད་ལྟ་འཚོ་ཞིང་བཞུགས་པའི་ཨོག་ཚོམ་དཀར་པོ་ཞིག་ལ་ཁུངས་གཏུགས་དགོས་ དོན་ཡང་མེད། དགེ་ཆོས་ཀྱི་གཏམ་རྒྱུད་གསེར་ཐང་ལྟ་བུ་ཞིག་ལ་ཆ་བཞག་ན་རྣམ་ཐར་མིན་ལ་རྟོགས་ བརྗོད་མིན། ལོ་རྒྱུས་རྐྱང་པ་ཞིག་མིན་ལ་དཔྱད་རྩོམ་ཏག་ཏག་ཞིག་ཀྱང་མིན། དགག་ལན་དང་ཆོ་ག་གང་ཡང་མིན་པའི་རྩོམ་ལུས་འདིར། དེང་སང་རྒྱ་རྩོམ་ཁོ་ན་ཀློག་མཁན་དག་ཏུ་ལྗོངས་རྒྱུའི་ཟིན་ཐོ་ཞེས་པ་དེ་ཨེ་ཡིན་ ནམ་ཞེས་ཚོད་བཤད་གནང་མཁན་ཡོད་མོད་ཞིབ་ཏུ་ན་དེའང་མིན་པ་རེད། དེ་དང་འདྲ་བར་རྣམ་རྟོག་གི་སྒོ་མོ་བརྒྱད་ཁྲི་བཞི་སྟོང་གི་མངོན་སྟངས་སྣ་ཚོགས་ ཡིན་པའི་སྙན་ངག་ཅེས་པར་རྩོམ་ལུས་འདྲ་མི་འདྲ་དང་མཚོན་སྟངས་འདྲ་མི་འདྲ་ཅི་ རིགས་བྱུང་ཟིན་འབྱུང་བཞིན་འབྱུང་འགྱུར་བཅས་ཡིན་པས། འདི་མིན་ན་དེ་ཡིན་དགོས་པའི་གཉན་འཕྲང་ཞིག་ཏུ་ཚུད་དགོས་དོན་ཅི་ཡོད་དམ། གང་ལྟར་ཁོ་བོ་ནི་ཚིག་ཐུང་ཡིག་ཉུང་ལ་བརྟེན་ཏེ་ཐོལ་བྱུང་འབའ་ཞིག་གིས་འབྲི་ དགོས་པའི་རྩོམ་པའི་རྣམ་པ་འདིར་དད་མོས་ཆེ་བ་མ་གཏོགས། རང་གི་འབྲི་བཞིན་པ་དག་སྙན་ངག་ཅེས་པ་དེ་ཨེ་ཡིན་ནམ་སྙམ་སྟེ་གནམ་ལ་ལྡིང་དགོས་ པའི་ཚོད་ཅིག་མིན། ང་ལ་མཚོན་ན་གཟུགས་པོའི་གསེང་ནས་རང་དབང་མེད་པར་གཏོང་རྒྱུ་ཞིག་གམ་དབུགས་ཀྱི་ འབྱིན་རྔུབ་བཞིན་སོ་སོའི་ཚེ་སྲོག་དང་རྦད་དེ་ཁ་འབྲལ་ཐབས་མེད་པ་ཡིན་ན་སྙན་ངག་ ཅེས་པ་མིན་ཀྱང་མུ་མཐུད་འབྲི་ངེས་ཡིན་ལ། དེ་ལས་ལྡོག་ཚེ་སྙན་ངག་ཅེས་པ་ཡིན་ཀྱང་རིམ་གྱིས་བསྐྱུར་ངེས་ཡིན། མདོར་དྲིལ་ན་ཁོ་བོས་སྙན་ངག་གམ་ཚིགས་བཅད་འདི་དག་འབྲི་བ་ནི་སྙན་ངག་ཅེས་པའི་ ཡིག་རྡོག་ལྔའི་དོན་ཙམ་མིན་པར། རང་གཞན་གཉིས་ཀྱི་གདུང་བ་སྦྲེལ་ཞིང་ཟུག་ཚོར་མཐུད་པའི་གོ་རིམ་ཞིག་གི་ཆེད་དོ།  

ཀ བདག་གི་གྲོགས་པོ་ཞིག་གིས། སྙན་ངག་ཅིག་སྙན་ངག་ཡིན་མིན་ཤེས་འདོད་ན་ད་ལྟ་མིང་དུ་གྲགས་པའི་སྙན་ངག་པ་འཇུ་ སྐལ་བཟང་ལྟ་བུ་ཞིག་ལ་བསྟན་ན་ཤེས་ཐུབ་ཟེར་བས། ཁྱེད་རང་ལྟ་ཚུལ་འདིར་འཐད་དམ།  

ཁ ངས་བལྟས་ན། འཇུ་སྐལ་བཟང་ལ་གཞན་གྱི་དེ་སྙན་ངག་ཡིན་མིན་ལབ་རྒྱུ་མེད་པའི་ཁར་ཁོང་རང་གིས་ བརྩམས་པ་དག་སྙན་ངག་ཡིན་མིན་ཡང་ལབ་རྒྱུ་མེད་སྙམ། རྒྱུ་མཚན་ནི། སྙན་ངག་ལ་མཚན་ཉིད་མེད་པས་ཡིན། མཚན་ཉིད་མེད་ན་མཚན་གཞི་ཅི་ལྟར་འཇོག འོན་ཀྱང་སྙན་ངག་ཡིན་མིན་ལ་མ་ལྟོས་པར་ངའི་བློ་ལ་མི་འགྲོ་བ་འདི་རེད་ངའི་རྩིས་ ཆེ་ཤོས་འདི་ཡིན་སོགས་འཇོག་རྒྱུ་ཡོད་ངེས་ཡིན། དེ་ཙམ་རྒྱུ་མཚན་དུ་བྱས་ཏེ་སྐྱེས་བུ་ཆེ་གེ་མོ་སྙན་ངག་ཡིན་མིན་འཇལ་བའི་ཚད་ ཤིང་ལྟ་བུ་ཞིག་ལ་བརྩིས་ན་ག་ལ་འགྲིག གོང་དུའང་བཤད་ཡོད་པ་བཞིན། སྙན་ངག་ཅེས་པ་མཐར་གཏུགས་ན་མིའི་སེམས་ཀྱི་འཕྲོ་འདུ་སྣ་ཚོགས་ཀྱི་སྤྱི་མིང་ལྟ་ བུ་ཞིག་རེད། ཡང་ན་འཕྲོ་འདུ་དེ་རིགས་མཚོན་པར་བྱེད་པའི་ཐབས་སྣ་ཚོགས་ཀྱི་སྤྱི་མིང་ལྟ་བུ་ ཞིག་རེད། ཐབས་དེ་ལའང་བྱུང་ཟིན་འབྱུང་བཞིན་འབྱུང་འགྱུར་བཅས་མུར་ཡོད་པ་ལས། སྔོན་དང་ད་ལྟའི་ཉི་མ་ཞིག་ལ་ཐབས་དེ་རིགས་ཀྱི་མཇུག་བསྒྲིལ་སོང་བ་ལྟ་བུ་ཞིག་ མིན། དེས་ན། བྱུང་ཟིན་འབྱུང་བཞིན་འབྱུང་འགྱུར་གྱི་མི་ཀུན་པོ་ལག་མཐིལ་ཏུ་བཀྲམ་པ་ནང་ལྟར་ རྟོགས་ཡོད་མཁན་དེ་སུ་ཡིན། དེ་འདྲ་གཅིག་ཀྱང་ཡོད་པ་མ་རེད། དེས་ན། རང་གིས་གོ་མྱོང་བའམ་རང་ཉིད་དགའ་པོ་ཡོད་པའི་འབྲི་སྟངས་རིགས་གཅིག་གམ་འགའ་ཞིག་ སྙན་ངག་ཡིན་པར་བཟུང་སྟེ། ལྷག་མའི་རང་གིས་མི་ཤེས་པ་དང་རང་ཉིད་མི་དགའ་བའི་མཚོན་སྟངས་ཡོངས་རྫོགས་སྙན་ ངག་མིན་ཞེས་ཕར་བཅད་ན་ཐབས་སྐྱོ་བ་ཞིག་མིན་ནམ། དེའང་མདོར་དེད་ན། སྐྱེས་བུ་ཆེ་གེ་མོ་ཞིག་གིས་སྙན་ངག་གི་ཚད་ཤིང་ཡོང་ཐབས་མེད་ལ་ཁྱིམ་ཚང་གཅིག་ དང་ཁྱིམ་མཚེས་རེ་ཟུང་དང་ཁུ་ཚན་འགའ་གྲོས་འགྲིག་པས་ཀྱང་མི་འོང་། དུས་རབས་བྱིངས་དང་ཀློག་མཁན་བྱིངས་ཀྱི་ལན་ཆ་ལ་དཔགས་ཏེ་སྐབས་དེའི་སྙན་ངག་ཡིན་ མིན་གྱི་རགས་པའི་ངོས་ཤིག་འཚོལ་ཐུབ་ཀྱང་སྲིད་མོད། ཡང་གཅིག་བཤད་ན། དེ་ནི་གཞན་གྱིས་ཐོལ་རིག་གི་རྣམ་པས་ཉི་ཟེར་དང་རྒྱ་མཚོ་ཡོངས་རྫོགས་སྨྱུག་ཁ་ གཅིག་གིས་དེད་འོངས་ཤུལ་ནས་བརྡ་ཆད་རེ་ཟུང་བསྒྲུག་སྟེ་ཆེད་རྩོམ་ཆ་མ་ཆོ་རིགས་ བྲི་དགོས་པའི་དཔྱད་བརྗོད་པ་དག་གི་ལས་ཀ་ཞིག་རེད་འདོད། འདི་དག་ལ་ཉི་མ་གཏོང་བ་ནི། དགེ་ཆོས་ཀྱིས། དེ་ལ་རྩོད་ཤགས་འགྱེད་པ་ཐང་རེ་ཆད། ། དེ་ཡི་རྒྱུ་མཚན་འཚོལ་བ་ཉོན་རེ་མོངས། ། ཞེས་པ་ལས་མ་འདས་སོ་སྙམ།

ཀ ཁྱེད་སོགས་ཀྱིས་བཅད་རྩོམ་གསར་མའི་ལུགས་ཀྱི་སྙན་ངག་གི་བསྒྲགས་གཏམ་ཞེས་པ་ སྤེལ་རྗེས། སྙན་ངག་པ་གཅན་མེ་སྟག་སོགས་ཀྱིས་བསྟོད་བསྔགས་འབུལ་བཞིན་པ་དང་། ཨ་ཁུ་རེ་ཟུང་གིས་ཁ་འབར་མ་ཞེས་དམོད་བཞིན་ཡོད་པ་རེད་ཟེར། འདི་ལ་ལྟ་ཚུལ་ཅི་ཡོད་དམ།

ཁ དེ་ཤིན་ཏུ་རྒྱུན་ལྡན་ཞིག་རེད། རང་མོས་སྙན་ངག་ཀྱང་ཐོག་མར་དར་སྐབས་མཚང་མིང་ཞིག་གིས་ལམ་ལྷོངས་བྱུང་བ་ཡིན། ___རྐང་ཆག་མ།

     གསལ་ བཤད། ཁ་བརྡ་འདིའི་བར་བར་རྒྱ་ནག་སྐེག་ཟློག་གི་འགྲེལ་སྟངས་གཞན་ཞིག་སོགས་ལས་འཕྲོས་ ཏེ་བཤད་པ་ཅུང་ཟད་མང་མོད། རྒྱུ་རྐྱེན་འགའ་རེའི་ཕྱིར་གནས་སྐབས་སུ་ཚུར་བླངས། མ་ཟིན་སྒྲ་ཡིན་པས་ཡི་གེར་འགོད་སྐབས་འཕྲི་སྣོན་བག་ཙམ་ཡང་བྱུང་ཡོད། དེ་བས་སྐད་ཆ་འདྲི་མཁན་གྱི་གྲོགས་པོ་ལ་དགོངས་འགལ་མེད་པ་ཞུ། དེ་མིན། ཉིན་འདི་ཚོར་མིག་ན་ཐག་ཆོད་པ་དང་དྲ་བའི་ནང་ལ་ལས་ཀ་རྩག་རྩིག་ཡོད་པ་བཅས་ཀྱི་ མདའ་ཤེར་གཉིས་ཀྱི་དཔང་པོ་ཞེས་པ་མཐུད་དེ་སྤེལ་མ་ཐུབ་པར་དགོངས་དག་ཞུ་རྒྱུ་ བཅས།