མཛའ་བརྩེ་ཡོད་ན་འཚོ་བ་ཡོད།
འཇིག་རྟེན་མུ་མེད་བྱེ་མའི་ཐང་སྟོང་ནས།།ཚེ་སྲོག་རླུང་གིས་ཁུར་ཡང་སྐྱོ་ཉམས་ཅི།།མཛའ་སེམས་གསེར་གྱི་ཐག་པ་མ་ཆད་ན།།མི་ཡི་འཚོ་གནས་འདི་ལ་སུན་དོན་ཅི།།
འོད་དུ་འཚེར་བའི་སྐད་ཆ།
ཁྱེད་ཀྱིས་ཡང་དག་ཡིན་མིན་འཁྱེར་ཡོང་ནས་སྙན་ངག་ལ་ཐུགས་སུན་མ་བཟོ་ཅིག ཚེ་སྲོག་གི་སྟོབས་ཤུགས་ཆེས་ཆེ་བ་དེར་བསྟོད་བསྔགས་བྱ་རྒྱུ་ནི་ཆེས་རྩ་བའི་ཡང་དག་ཡིན། ཁྱེད་ཀྱིས་དཔྱོད་ཤེས་མིན་པ་དེ་འཁྱེར་ཡོང་ནས་སྙན་ངག་པ་ལ་ལེ་བདའ་མ་བྱེད་ཅིག རང་དབང་ལ་འབོད་སྐུལ་སྒྲོག་རྒྱུ་དེ་ནི་ཆེས་རླབས་ཆེན་གྱི་དཔྱོད་ཤེས་ཡིན
ཟིན་བྲིས་བཟོ་བཀོད་པ་བསོད་ནམས་འོད་ཟེར།
བཀླགས་གྲངས་མང་ཤོས།
-
ཞོགས་རླུང་བསིལ་མོས་ཅུང་ཙམ་སྒུལ་ཚེ་ལྗོན་ཤིང་དགའ་བའི་རྐང་བྲོ་བསྒྱུར།། ཀྱུར་ཀྱུར་བྱེའུ་གསུང་སྐད་སྙན་མོས་དབྱངས་ཀྱི་འཛམ་མདངས་མཁའ་ལ་དྲངས།། ... -
མགོ་ནག་བོད་པའི་སྐྱོ་གདུང་དམར་པོ་གནམ་སའི་བར་ནས་ཁྲག་གིས་ཚོས།། གསར་ཚེས་ལོ་ཡི་ཁུགས་སོ་རེ་ནས་ལུས་སྲོག་སྒྲོན་པའི་མྱ་ངན་ལུད།། སྐྱོ་སྡ...
-
རྡོ་ལ་འཕྲུ་དཀར་རྙེད་པ། དེ་རིང་ང་གངས་ར་ན་ཡོད། གྲོང་དང་གྲོང་ཚོ་བསྲེས་པའི་གངས་ར་ན་ཡོད། སྐྱེས་དངོས་ཀྱིས་གྲོང་བརྡལ་འདེགས་...
-
བྱ་གཞུང་དབྱངས་བྷ། ཉེ་སྔོན་རྒྱ་ཡིག་གི༼ཀློག་པ་པོ༽ཞིག(༠༩ལོའི་དེབ་བཅུ་པ)ལས་ཁ་བྱང་ལ༼ཕ་གིའི་འཇིག་རྟེན་དབེན་ཐང་ཐང༽ཞེས་པའི་རྩོམ་ཐུང་ཞིག་མཐོང་བ... -
མི་ཚེའི་དྲན་ཤིང་རིང་མོའི་ཐག་སྣེ་ལ་མདུད་ཅིང་།། ཀུན་ཤེས་གཟུང་འཛིན་ཡིད་ཀྱི་གཏིང་རིམ་ནས་བསླངས་བ།། ནམ་ཡང་བརྗེད་དུ་དཀའ་བ་ཆུང་འདྲིས་ཀྱི་མེ་ཏོག།...
-
༼ཐེ་ཀོར་གྱི་སྙན་ངག << འཇིག་རྟེན་ སྟེང་གི་ཆེས་རིང་བའི་བར་ཐག >> ཅེས ་པ། བོད་བསྒྱུར་བྱེད་མཁན་ འབའ་སྨད་རྒྱ་ལོ་ཚེ་རིང་ ། ~~... -
ཕ་ཡུལ། གཟུངས་ཕྱུག་སྐྱིད། རྒྱ་གར། རླུང་གི་གཤོག་འགྲོས་ལས་ས་ཆེན་གྱི་འཁུན་སྒྲ་ཐོས་ཤིང རི་བོའི་འགུལ་བསྐྱོད་ལས་གནམ་མཁའི་རྒྱ་ཁྱོན་མཐོང...
-
--> བྱ་གཞུང་དབྱངས་བྷ། རི་བོའི་དཔུང་གདང་ཤིག་ཤིག་གི་ཕ་གཞིས ཆུ་མོའི་ལག་གདང་ཤིག་ཤིག་གི་མ་གཞིས རི་ཚོགས་ཀྱི་ཕྱི་ཤུན་འདོར་དུས... -
དོན་ངོ་མར་སུ་ཡིན་ནམ བཀག་སྡོམ་དང་མུན་ནག་གི་གྲོང་ཚོ བསྐྱར་ཟློས་དང་ཤ་འཁོན་གྱི་འཇིག་རྟེན མི་ཡུལ་འདིའི་འཚོ་སྡོད་ཐེངས་ཤིག་གི་རྗེས...
-
རླུང་གི་གཤོག་འགྲོས་ལས་ས་ཆེན་གྱི་འཁུན་སྒྲ་ཐོས་ཤིང་ རི་བོའི་འགུལ་བསྐྱོད་ལས་གནམ་མཁའི་རྒྱ་ཁྱོན་མཐོང་དུས བདག་གིས་ཁྱེད་ཁོ་ནའི་མཛེས་སྡུ...
Saturday, 3 December 2011
བྱ་གཞུང་དབྱངས་བྷ།
རི་བོའི་དཔུང་གདང་ཤིག་ཤིག་གི་ཕ་གཞིས
ཆུ་མོའི་ལག་གདང་ཤིག་ཤིག་གི་མ་གཞིས
རི་ཚོགས་ཀྱི་ཕྱི་ཤུན་འདོར་དུས ཕ་མེས་ཀྱི་གཏམ་རྒྱུད་དྲན་བྱུང
ཆུ་རྒྱུན་གྱི་གླུ་སྒྲ་འཇགས་དུས རྨོ་མོ་ཡི་ངག་རྒྱུན་དྲན་བྱུང
— སྔོན་འགྲོ
ངག་རྒྱུན ངག་རྒྱུན་གྱི་ཆུ་རྔ་ཕྲ་མོ
སུ་ཞིག་གི་མིག་ཀོང་ནས་བབས་འདྲའི་ཧོར་ཆུ་ཁམ་པ་སྔོ་རིང
ངག་རྒྱུན ངག་རྒྱུན་གྱི་ཆེས་མཇུག་མཐའི་བཞུར་སྟངས་བྲང་ཁོག་ལ་འཁྱིལ་དུས
འཁོར་གསུམ་ལུས་ལ་བསྐོར་བའི་དཔའ་རྟུལ་ཤན་པ་རྣམས་ཅིས་མི་དྲན
ད་དུང བཙུན་མོའི་ར་མདར་འགྲོ་བའི་རྒྱལ་བོ
འདོད་བརྩེའི་མེ་རི་པང་བའི་བཙུན་མོ སྐུ་མཁར་རེ་རེ་དང་གླུ་ངག་རེ་རེ
ཆགས་སྡང་གི་མིག་རྩ་དམར་པོ གད་རྒྱངས་དང་འཁྲུག་རྩོད…
…
ངའི་མིག་མདུན་དང་ཁྲག་རྩའི་སྦུབས་ནས་ཟད་ཀྱིན་པ་ཡོད་ཚད་ཅིས་མི་དྲན་ཨང
ཁྱོད་ནི་ལྟེ་ཐག་ཅིག་ཡིན་ནམ
གངས་རི་དང་མཚོ་མོ་ཁྲག་དང་ཁུ་བས་སྦྲེལ་ཡོད་དམ
ཁྱོད་ནི་ལག་པ་ཞིག་ཡིན་ནམ
ལོ་ངོ་སྟོང་ཕྲག་གི་ངག་རྒྱུན་གྱི་མེ་ཏོག་བཏུས་ཤིང་འོང་ངམ
ལོ་རེ་རེར ཕྲུ་གུ་ཁྲི་ཕྲག་མངལ་ལ་བཟུང་བའི་ཉ་མོའི་ཁྱུ
མཚོ་མོ་དང་གྱེས་ཏེ་གཙང་བོའི་གཞུང་ལ་འབྱོར་རྗེས
མ་བུ་ཁྲི་མ་འབུམ་གྱི་ལྡོག་ལམ་སུ་ཡིས་བཅད་སོང་ངམ
ལྟོ་བ་དཀར་པོ་ཁྲི་མ་འབུམ་གཟེབ་རྒྱའི་ཁུགས་ནས་དཀར་ཤིག་ཤིག་བྱས་བྱུང
ཁྲི་ཤོར་རྒྱལ་མོའི་གཅེས་ཕྲུག་ཁྲི་མ་འབུམ་ཕྱིར་མཚོ་མོའི་པང་ལ་ལོག་མ་བྱུང
རི་སྤྱང་དང་དགོ་ཁྱུ་གནའ་ཁྱུ་མཚོ་དར་བཞིན་ཡལ་ཤུལ་གྱི་རྩྭ་ཐང
བཙན་པོའི་དམར་ནག་གི་རུ་དཔུང་གླང་ཆེན་བཞིན་རྒྱུ་མྱོང་བའི་རྩྭ་ཐང
ལྕགས་དྲས་ཆོད་མ་ཆོད་མར་གཏུབ་པའི་རྩྭ་ཐང
གཡུང་མོ་ལུག་ཁྱུ་ཁོ་ན་བག་ཡངས་དོགས་མེད་དུ་འཚོ་བའི་རྩྭ་ཐང
གཡུང་མོ་ལུག་གི་རྩྭ་ཐང་དུ
ཁྱོད་ཀྱི་ཆུ་རྔ་ཕྲ་མོ་དེ་ཁོ་ན་སྔོ་ལྷོག་ལྷོག་རྒྱུག་གིན་འདུག
མཇུག་མཐའི་ཉ་མོའི་ཁྱུ་དེ་ཁོ་ན་བྲེད་ཤ་འཚུབ་བེར་འཁྱུག་གིན་འདུག
“ཡབ་ཆེན་གྱི་རྩྭ་ཐང ཡུམ་ཆེན་གྱི་གཙང་བོ”ཨང
ཟུངས་ཁྲག་བཞིན་ལྷོག་ལྷོག་རྒྱུག་པའི་ཁྱོད་ཀྱི་འགྲམ་ངོགས་སུ་འགྲེང་དུས
གདུང་ཟུག་དང་ཆགས་སྡང་ཡོད་ཚད་གཙང་བོ་ཞིག་ཡིན་པ་ཚོར་བྱུང
གཙང་བོ་དང་ངག་རྒྱུན་ཡོད་ཚད་ཀྱི་མགོ་ཁུངས་རེ་ན
གངས་རི་ལྟ་བུའི་རྒྱབ་རྩ་བཙན་པོ་རེ་ད་དུང་ཡང་བརྟན་ལྷིང་ངེར་འགྱིང་ངམ
གཙང་བོ་རབ་མེད་དེ་བྱང་ཁོག་ནས་བྲུག་ཐེངས་རེ་དང
མཚོ་སྙིང་ནས་རྒྱང་ལ་བྱེར་བའི་གསེར་བྱ་ངང་པ་རྨི་ལམ་དུ་འཁོར་ཐེངས་རེ་ལ
ངག་རྒྱུན་གྱི་ཆུ་རྔ་ཕྲ་མོ་སྲུང་ཞིང་བསྡད
ཟུངས་ཁྲག་གི་མགོ་ཁུངས་ན་གངས་རི་ལྟ་བུའི་ཅི་ཞིག་ཡོད་སེམས་ཀྱིན་བསྡད
སྐབས་དང་སྐབས་སུ
དབུ་རྩེ་གཟེང་གཟེང་གི་རི་ཚོགས་སུ་ཞིག་ལ་ཕུལ་བའི་ལབ་རྩེ་ཡིན་ནམ་སྙམ
ཆུ་རིས་ཆིལ་ཆིལ་གྱི་གཙང་བོ་སུ་ཞིག་ལ་བཤམས་པའི་མཆོད་པ་ཡིན་ནམ་སྙམ
དམར་ནག་གི་ངོ་གདོང་རེ་རེ་ནི་འགུལ་ཤེས་པའི་ངག་རྒྱུན་རེ་རེ་ཡིན་ནམ་སྙམ
སྐབས་དང་སྐབས་སུ
པོ་ཏཱ་ལ་ནི་ཚོན་རྩི་དཀར་དམར་བྱུགས་པའི་རི་བོ་ཞིག་ཡིན་ནམ་སྙམ
སྐབས་དང་སྐབས་སུ
སེམས་པ་འདི་གཙང་བོ་བཞུར་ཤུལ་གྱི་གྲམ་གཞུང་ཞིག་ཡིན་ནམ་སྙམ
སུ་ཞིག་གི་ཁ་ཕོར་དང་འདྲ་བའི་གངས་རིའི་མུ་ཁྱུད
མིག་ཀོང་ལྟ་བུའི་ཕོར་ཁ་ན སྔོ་ཆིལ་ཆིལ་འཁོར་བའི་ཁམ་པ་སྔོ་རིང
བྲི་བཞིན་པའི་ལྟེ་ཁྲག་གམ་ཁུ་བ་ཕྲ་མོ་ཁྱོད
ནམ་ཞིག་ཉ་མོའི་ཁྱུ་དང་འགྲོག་སྟེ་ངག་རྒྱུན་དུ་འགྱུར་སྲིད་དམ
འགྱིག་ཤོག་ཉ་མོ་བཞིན་རྒྱུ་བའི་གྲམ་གཞུང་སྟོང་བ་ཞིག་ང་ལ་བསྐྱུར་སྲིད་དམ
འདམ་མྱགས་དུམ་བུ་དུམ་བུར་གས་པའི་མཚོ་ཤུལ་ཞིག་ང་ལ་བསྐྱུར་སྲིད་དམ
2007.8.27ཉིན་མང་རྫོང་ནས་ཡི་གེར་ཕབ།